شحالْ ما كتَبتْ
وملِّي بغيتْ نشربْ شوية من المدادْ
باش نقبّلْ الورقة
لقيتْ بياضها بهاتْ
...
هي غي الدنيا اللِّي ظلامها باع بصيرتُه
الليلْ نعسْ فكف الذيبْ
والنهار فتح عينيه على بسمة
شوفتها عطشانة
...
السرابْ فرحبتنا بلا شطارة
ملِّي درسنا احصادنا
داتو الريحْ
ما عشّرنا اللّي فاتْ
ما ساوينا للحديثْ مَنبرْ
...
رابْ من الجدرْ لغانا
واحلامنا مْترعة
كفنها شلّ كلامْ
ملٍّي جينا
ما بْقَ طلْ خريفُه
وصية عريانة
كتبها وعدْ للريحْ باش تسوكْ بها
...
اجي نتوانسو فالضيقْ
باش فالرخا تدومْ المحبة
إلى عماتْ الطريقْ
قبلْ الشوفة ما تفيقْ
نرسمو خطْ جديدْ
باش نعلمُو قلوبنا فوسطْ الظلامْ
إلى تخلطاتْ الكسداتْ
...
هي غيرْ ذكرى بقاتْ ريحتها فمريرة
فكرني بها الجبلْ
ملِّي كبرَتْ خطواتي
ملِّي شقايَ نْفذْ لعرقي
ملِّي البرْ كتبني رسالة للبحرْ
ملِّي المدادْ
سلّفني نقطة من الرجا
نقطة من الاملْ
وحفنة من الصبرْ
شاطَتْ على الرملْ
ملِّي الشمشْ عطاتْ بظهرها للظلْ
...
هو غير انا
عادْ تفكّرتني عايشْ
ملِّي كيسكت حسْ الحرفْ كولْ متنا
...
عبدالعالي الوالي
