شكون يشهد للضو ؟
إلى الشاعرة رشيدة فقري اعترافا بما تسديه من خدمة نبيلة للإبداع الإنساني.
* * * * *
فالت
جيت من جسدي الثالث
لون شاد ف لون
الفكرَه كون تقول لي كن.
ندفن النهايه ف لَبْدايه
نشرك الطبيعَه فالخلق .. تشركني فالغايه
نبقى جاهل كيف نكون.
على راس كل ساعَه راس
يضرب على راسُه
دقْ .. دقَّه .. دقيقيقَه . شكون ؟
كرونوس اكل اولادُه
وباغي يزيد ما بقى فالكون
والليل راﭬد على جنب الصداع
منَعَّس الحياة ... مْسَكَّن السُّكون.
العيطه على من يا بوسايدون ؟
نتلَوْنوا ع الَمْكان بكل لون
يتلوَّى علينا الزّْمان بارد سخون
نغَيْبوا الواقع أَوْ يغَيَّبنا
لعقل هو المسجون
نفرحوا للخطيَّه
لخطيَّه فيها إنسان
والإنسان بلا حياة مرهون.
تقْلَب الميزان ف ظلام الحس
تقطعت النفس
شكون يشهد للضو شكون ؟
نحلم حلمَه نتَرْمَى فيها
تنقز كبدتي من عيني
تطلب ما هو ديالها
وديالها إنسان .. الإنسان ديالها.
بالحياة يوسَّع عيون
بحلاوتها يرطَّب لسون.
* * *
نتصوَّر إنساني، نترمَى ف قلبه
نشربُه ما ، يشربني ريح
نشربُه نار ، يشربني جنّه
ترقص المعنى
نتلاقاوا ف ما بعد الوعي بشمس من سنَه.
وإنساني اللي كنت به نتكنَّى
خلاّني ف مرايتي نتسَنَّى
وظلي اللي كنت به نتعَنَّى
طار بطيفُه يتغَنَّى
الدورَه اللولى دار بيَّ
الدورَه الثاني دار عليَّ
الدوره الثالثه دار فيَّ
أنا البارح ما قلت نكرني طيني
ولا خانني سعدي
ونا اليوم ما نقول ظلامت الدنيا ف عيني
ولا تقاضى جهدي
برَّح يا مير لمحبَّه1 لجرسيف
إلى كانت الذاكرَه خبّاية الشهاده
أخنوخ جرموه بالسيف
ذَكَّر يا عريس لبها2 فاس
إلى كانت الشهادَه بلا ذاكرَه
أحنوح حي ردموه فالساس
ترجم يا هالة الزيتونَه 3 لمكناس
إلى دَوْدَت الملحَه
رميس باقي ما قطع لياس
فكري يا مجذوبةْ المايَه عَش الخاوا
دورس له قلب و إحساس
وخير من قال ف لخلا تساس
اشهد يا نصّاف الحال5 للبيضا
إلى كثر لحفير ف ظهر النهار
ضو دِغيس ما مخوفاه كحولية الفاس
انصر يا سقّاي الأمل الحق
الحق باقي بمواليه
لِه .. لِه ادريسا اعطى بالراس
حتى يشوف فين حد الباس
اكتب يا طير لجبال7 للأطلس
لمعاني باقِيَه تبني لها اقواس
ولَقواس باقي لهم لقلم مع الكرّاس
وانت يا خديم الزجل8
لا تقل ل تيفلت. قل للتاريخ
" قلب ادريس أعرى من كاس
وكبدتُه باقي لها فين تعمل الناس ".
ادريس أمغار مسناوي
تيفلت 25 / 06 / 2010 م
1 _ الزجال حفيظ اللمتوني / 2 _ الشاعر أبو الصفاء.
3 _ الشاعر أحمد نصرافي/ 4 _ الزجالة نعيمة الحمداوي.
5 _ الزجال علي مفتاح / 6 _ الزجال توفيق لبيض.
7 _ الزجال خليد المساوي/ 8 _الزجال حميدا البلبالي.
إدريس هو : أخنوخ ف متون الأهرام . أحنوح فالتوراة .
رميس عند الإغرقيين . دغيس عند المسحيين .
دروس عند الأمازيغ ، إدريسا أو إدريسو عند الأفاريقَه ....
